Ontwikkelingsprogram
Die opvoedkundige programme by Tinktinkieland Preprimêre skool is geskep met ons kinders se behoeftes in gedagte: om ‘n sterk hart en lyfie te ontwikkel in 'n veilige stimulerende omgewing
Kyk hieronder om meer oor elke program uit te vind..
Ons fokus op taalontwikkeling, nie net as kommas en punte nie, maar wat gesê word, hoe dit oorgedra word en die hart agter elke woord. Ons leer wat mag ek vir my maatjie sê, hoe ek dit moet sê en dat die intensie net so baie saakmaak. Ons leer ook wat mag ek vir myself sê en hoe ek met myself moet praat.
Alle nodige areas van grootmotoriese ontwikkeling ontvang aandag op 'n gereelde basis. Ons fokus ook nie net op 'n sterk gesonde lyfie nie, maar ook hoe ek die sportveld betree. Ons leer dat sport harde werk en deursettingsvermoë verg, dat ek nie altyd wen nie en hoe om my teenstanders met respek te hanteer.
Ons leer kleuters vra vrae, antwoorde soek, drome droom en om dit alles met selfvetroue na te jaag. 'n Soeke na die waarheid en die selfvertroue om daarop te staan is 'n eienskap wat sterk aangemoedig word.
Soos ons almal weet is hierdie die area waar ons kleingoed die swaarste kan trek, veral as ons die sosiale media aspek hiermee kombineer. ‘n Sterk waarde van self en gesonde vriendskappe word motiveer wat goed is vir beide partye, wat kommunikeer as iets nie pluis is nie en verstaan hoe om soms te gee eerder as om net te ontvang.
In 'n wêreld wat al hoe meer grys word, leer ons die kleuters hoe om vas te hou aan die positiewe aspekte van die lewe. Ons leer hulle dat daar altyd genoeg genade vir vandag is, en dat daar reeds voorsiening vir môre is.
Ons leer hoe om planne te maak vir alledaagse probleme. Ons oefen hoe om weer en weer en weer te probeer totdat my lyfie die uitdaging bemeester. Ons fokus op probleemoplossende spelmetodes deur nie elke dag 'n terrein vol gekoopte speelgoed uit te pak nie, of voorwerpe wat met die regte verbeelding op die maan kan land of ‘n massiewe brug bou – dit hang net af hoe jy daarna kyk.
Alhoewel hierdie ons fokus is ná die groot motoriek van die lyfie, ontvang die fynmotoriese ontwikkeling daagliks aanmoediging, motivering en inoefening. Ons besef dat papierwerkies 'n goeie manier van terugvoering is, maar ons fokus sal altyd meer konkreet bly.
Om kleuters emosioneel gereed te kry vir die grootskool kan as een van ons grootste take gesien word. Ons wil 'n "ek kan" en "ek is genoeg" houding vasmaak.
Buite-die-boks denkers. Kleuters word daagliks uitgedaag om nuwe, ander en eie planne te maak. Die wêreld het 'n behoefte aan jongmense wat vir hulself kan dink, nuwe idees na die tafel te bring en die selfvertroue het om dit deur te voer. Ons glo ons Tinktinkies gaan die wêreld verander.
Elke aspek wat ons aan ons kleuters deurgee, leer en vasmaak is gegrond op die waarheid van die Bybel. Ons weet vanwaar ons krag, hoop en vreugde kom en so ook die kleuters van Tinktinkieland.
